يا حبيبة .....للشاعر بهاء توفيق

يا حبيبة


لما بابعد بعدى عنك يا حبيبة مش بإيــــــــــــــــدى
رغم بعدك عنى لكن ساكنه شريانـــــــــى ووريدى
ساكنه نبض القلب ساكنه جوه حبـــــــــــات العيون
يا جميله وفين ما اكون انتـى بتكونــــــــــى نشيدى

****

الحنين اللى فـ عينيا بان عليا من بعــــــــــــــــادك
دانتى اغلى حاجة فيا انتــــــــــــــــى ليا ولـ ولادك
انتى ست الحسن كله باسمعك عنــــــــــــــوة رقيقة
المحال جنبك حقيقة ياللـــــــــــــى شغلانى بودادك

****

قالوا ياما عليكــــــــــــــى ياما ياللى عنى متوهانى
اللــى يشـــــــــــرب نبع نيلك راح يعــود للنبع تانى
شـــــوفى عاد وانا حتة منك جوه منى تلاقى خيرك
مهما طفت وشفت غيرك برضوا عارف فين مكانى

****

بعترينـــى ولملمينـــى وارسمينى فوق حيطانك
حلم نيلى لون عيونك حلم اخضر لون غيطانـك
اصلى لما عشقت حسنك قلبى دوّب نفسه فيكـى
ياللى شغلانى بعينيكى قلبى طول اللعمر صانك

****

فـ المعابد يا حبيبتى ع الحيطان حفروا جــــدودى
الحضارة والأصالة والصمود اللى فـ وجــــــودى
وانا لولا يا عمرى عارف مين الهى اللى خالقنى
كنت للأهرام اسبّح ولترابك كان ســــــــــجودى


بهاء توفيق
منفلوط /2000

الجنازة

الجنازة

الليل شبح...!!

منقوش على كل الوشوش

الخوف بيتحدى الجيوش

فمتتعبوش...

وتحاولوا تعديل المسار

لا .. انتصار

للى ارتضى يوم الخضوع

للى ارتضى يوم المهانة ولستكانة والخنوع

للى ارتضى انه يموت

دافن حركته وكلمته جوا السكوت

تحت البيوت الميته

كل المواسم شكلها اصبح شتا

طالعه الجنازة بس ليه مش ملفته

يا ايها الميت هناك ...

يا ايها الميت هنا ...

لو كان كلامى هيجرحك

اسف انا

الحق لجل ما ينتصر محتاج لميت مليون سنه

فبلاش تموت

يا تموت مفجر الف دانه فـ سكتك

يا بلاش تموت

يا تموت تصحى الميتين من صرختك

يا بلاش تموت

يا تموت محرر غنوتك مع ضحكتك

يا بلاش تموت

يا ايها الميت هناك

واقف بترمى ليه حجر

وبترمى ليه روحك هدر

فاكر حجارتك يوم هتصنع معجزة

فاكر اذا ....

شفنا الكفن راح ننتفض

حتى الدموع جوا العيون متتعززة

يا ايها الميت هناك

كل الخلايا فـ جتتى متنرفزة

صورتك بدمك فى عقول كل البشر متبروزة

فـ لمين بتعلن لنتفاضة ولحتجاج

كل العيون ملت خلاص من رؤيتك

كل الودان تعبت خلاص من صرختك

كل القلوب مفهاش مكان

تحزن تحن لمحنتك

فلمين بتعلن لنتفاضة ولحتجاج

يا ايها الميت هناك

يا تموت شهيد....

ويموت قصادك الف قرد من القرود الاغبيا

يا بلاش تموت

محناش ف عهد المعجزات والانبيا

علشان حجر يصنع لوحده الانتصار

عمر الشهادة والبطولة فى يوم ما كانوا انتحار

عمر النهار.... ما هييجى صدفة لارضنا

يا ايها الميت هناك

لو كان كلامى جرحك

اسف انا.... اسف انا ....اسف انا

بهاء توفيق

منفلوط

14-3-2001

فانتازيا

فانتــــــــازيا

مزج اول :

النص واقف فـ الشمال ...

العرض شغال فـ اليمين

اتخانق النقاد سوى ...

اتخانق المتفرجين

تقسيمة تشبه قتل سيدنا الحسين

تغريبة من عهد الهلالى

ف الف ليلة والف بحر والف كلمة والف حرف مفردين

مع الف فكرة بتتخنق جوا الصدور

كان السيناريو والحوار وجميع شخوص العرض .....

واقفين ف الطابور

الارض بتفرق سكك

الشمس بور

العتمة ما بتفرقش ابداً برة او جوا القبور

فاستسلمى يا نفس ليا وابدائى حالة كمون

جسدى المهيأ للسكن اصبح مهيأ للسكون

طعم الجنون لساه يا موت متملكك

اطلق بخور عريك على كل الملا من غير خشا

كمل طقوس الانتشا واشربنى كاس

لملم حدودى كلها من راسى ولحد المداس

اصلبنى بين المستحيل والممكنه

علقنى بين اللا مكان والامكنه

لسه الدروب السد مستنيه نور

***

مزج أخر :

اغزلنى معزوفة بكا للصيادين

الحزن دمى وغنوتى ....

الحزن وقت الكفر دين

البحر دوره ماهوش محدد ع الورق ....

من حقه انه ينسحب لو حس ان الدور مهين

للبحر شخصية نبى ....

وبلدنا بكر عروسة بنحنيها ليه

فيمد يلمس جسمها كله بعينيه

البحر مدد جسمه يحضن شطها ويحل ضفايرها بأيديه

حاول يفك طلاسم المجهول هوى

ما ضل صاحبكم وما - ابدا -غوى

لكن دوره بينتهى قبل الولوج

فيشد نفسه وينسحب ..!!

مشهد خرافى بتصنعه حالة غضب

وانا كنت فاكر انه حافظ دوره صم

الكادر اصفى من الفضى

لكنه كان مصبوغ بدم ..!!!

****

مزج ثالث :

تعبت شواشى النخل من برد الشتا

فاتقرفصت جنب الكانون ...

تتلقى من صهده الدفا

كان الكانون طيب قوى

خاف ع الشواشى لتنحرق

اختار تعيش....

واختار لنفسه الموت

........... طفى !!!

****

قطع مفاجئ :

للعلم بس ...

الشمس لونها رمادى مش بمبى

قلقانه تظهر تختفى جنبى

***

مزج اخير :

الحلم تكعيبة عنب على كل دار

الحلم اقوى من الدفا /البرد/الليل /النهار

الحلم شباك للسما

مرجيحة بتطوحنا فوق

من خاف من الحلم اتحرم

تلاقيه يفوق

الشمس دورها يبتدى ....

فترش حبة ضى على وش القمر يتهد

سلم خشب .... على سطح بيتنا .... فـ حارة سد

بهاء توفيق

منفلوط

2001

هدى

هــــــــــدى

الذنب ذنبك يا هدى..!!

انتى اللى فهمك كان غلط

انتى اللى بوحتى بسرنا....

وقت السكوت المفترض

فـ ازاى قدرتى تعملى قلبك جريح ..؟؟

وبأى حق بتعلنى نفسك مسيح ..؟؟

شايل على كتافة الالم

وانا مش مهيأ للبكا او للنواح

ف بأى حق بتسكتى ..

لحظة ما عينى بتلمحك وبتقتلى حلم البراح

وترشى ف ودان الطرق ...

حبة دموع ..فتسدهم

فميسمعوش ابدا لصوتى

وصرختى.... بتضيع سدى

الذنب ذنبك يا هدى

*****

ازاى قدرتى تخدعينى ...

وتسبكى دور الملاك..؟؟

وانتى الهلاك ..!!

بتطلعينى المتهم...!!

الذنب ذنبى وغلطتى انى بحبك من زمان

انى عشقتك طيبة.. وقريبة.. وكلك حنان

انى وصلت باندفاعى ناحيتك حد الجنان

ففتحت لك 2000 طريق على سكتى

واشتقتلك وانتى معايا فى خطوتى

ياللى عشانك كنت باصنع ضحكتى...
حتى ف اوقات الشقى

افهم بقى ...!!

هى دى كانت كلمتك ......مفهمتهاش

انا محتجالك...!!

برضو كانت كلمتك ...... مسمعتهاش

فـ بدأتى وحدك تزرعى شجر الجفا

ورويتى زرعك بالخصام

فجأة وهزيتى الشجر...

سقط الوجع..!!

خلى ما بين ايدك وايدى 1000 عام

شتت هوانا وفرحنا جوه المدى

الذنب ذنبك يا هدى

*****

الذنب ذنبك يا هدى فـ متزعليش

فلئن حاولتى ترجعيلى ....مترجعيش

لو ليا هتكونى الحياة رافض اعيش

كافر بكل مبادئ الحب الغبى

لانتى الصبية اللى بيتمناها قلبى...

لو رجعت اكون صبى

انتى مجرد غيمة عدت ف السما

مسابتش لـيا غير حوف متألمة وحبة سكات

الحب قبل ما يتولد كان طب مات

فبقيت انا وانتى سوى زى العدا

الذنب ذنبك ولا مش ذنبك خلاص....

انسى الحكاية يا هدى

انسى... الحكاية... يا.... هدى

بهاء احمد توفيق

منفلوط -2001

جسر الحنين

مدّى ما بينا وبينـــك يا بلد جســر الحنين
لسـه فيكى كتير غلابة لســة فيكى محرومين
محتاجينك تبقى لينا ........ محتاجينك من سنين
افردى شـــراعك علينا مـدى لايدينا الايدين
كل كرب وله نهاية وانتى كربك اخره فين ؟؟؟


ايوه بنحبك يا بلدى حب واجب فـ العبـــادة
بس ليه ايدك بتــدى للى مش محتاج زيادة ؟
واحنا لما نمد ايدنا .... ليه بناخد بالبيـادة ؟؟؟
احنا مش برضك ولادك ولاّ يعنـى ولد مين؟!
كل كرب وله نهايه وانتى كربك اخره فين ؟؟؟


زى ما حنا محتاجينك ....... يا بلدنا محتاجانا
مش هتلقى انتى نفســـك يا بلدنا غير معانا
فكى قيدك من ايدينا شيلى ضعفك من دمانــا
ولاّ بس ازاى هنبنــى والايدين متربطين ؟؟
كل كرب وله نهايه وانتى كربك اخره فين ؟!


يا بلد رامية فـ ولادك يا بلد حاضنه الديابـة
احنا عايشين جوه منك ولاّ عايشين وسط غابة
السؤال اللى شاغلنى ولسه مالقتلوش اجابــة
ليه بيوت الشر تعلى فوق بيـوت الطيبين ؟؟؟
كل كرب وله نهايه وانتى كربك اخره فين ؟!!


يا بلــدنا قربينا ....... حسسى قلوبنا بأمان
جمعينا جوه قلبك وافتحـى طــاقة حنــان
واحنا هنعلّى المبانى واحنا راح نزرع غيطان
يا بلد واخدانا منا .... يا بلد رايحـــه لفين
افردى شراعك علينا...... مدى لايدينا الايدين


بهاء توفيق
منفلوط /2001