مدونة الشاعر بهاء توفيق

السبت، 10 أكتوبر 2009

منتدى ايجى نت

منتدى ايجى نت هو اخر الصفحات الالكترونية التى تم نشرها على الانترنت وهذا المنتدى هو نتاج شخصى وتصميم خاص بى
ارجوا منكم زيارة هذ المنتدى والتسجيل فية حتى نستفيد من خبراتكم وان شاء الله " يعجبكم "
انا فى انتظاركم على الرابط التالى
منتدى بهاء توفيق

السبت، 7 مارس 2009

قصيدة "خد كلابك يحرسوك" للشاعر بهاء توفيق

خد كلابك يحرسوك

يابن طين الأرض ناسك …

جوا جوف الأرض بكره هيدفنوك

بكره عن قتلك عيالنا…

واكل مالنا هيسألوك

فالأصح تخلّى بالك

او بقول تعمل حسابك..

خد كلابك وانت رايح يحرسوك

****

اجمع الدولارات وستف

ملياراتك فى البنوك

سيبنا ناكل بعض واسمح …

للديابة يمجدوك

سيبنا ناكل طوب وبرطع ..

عيش كما عيشة الملوك

بكره من زقوم جهنم يملوا بطنك

والحميم هيشرّبوك

قوللى كام مليار هتدفع ….

لجل منها يطلعوك

****

قول يا فرعون الحداثة …

السياسة انك تجوع شعب لجل ما يعبدوك

او بايدك تعمى عين اللى على اصلك شافوك

او تهيف شعب كورة …

لجل ما يغضوا بصرهم عن فضايحك ويسيبوك

سودنا عيش واخرب بيوتنا ..

وادبح اللى يكلموك

بكره هتحس بعمايلك

لما بمقامع جهنم …يربطوا ويسلسلوك

لما صبح وليل على النار يعرضوك

لما فوق الجمر تغلى ..ويسحلوك

قوللى كام مليار هتدفع…

لجل منها يطلعوك

فالأصح تخلّى بالك

او بقول تعمل حسابك

خد كلابك وانت رايح يحرسوك

بهاء توفيق

الجمعة، 18 أبريل 2008

يا حبيبة .....للشاعر بهاء توفيق

يا حبيبة

لما بابعد بعدى عنك يا حبيبة مش بإيــــــــــــــــدى
رغم بعدك عنى لكن ساكنه شريانـــــــــى ووريدى
ساكنه نبض القلب ساكنه جوه حبـــــــــــات العيون
يا جميله وفين ما اكون انتـى بتكونــــــــــى نشيدى

****

الحنين اللى فـ عينيا بان عليا من بعــــــــــــــــادك
دانتى اغلى حاجة فيا انتــــــــــــــــى ليا ولـ ولادك
انتى ست الحسن كله باسمعك عنــــــــــــــوة رقيقة
المحال جنبك حقيقة ياللـــــــــــــى شغلانى بودادك

****

قالوا ياما عليكــــــــــــــى ياما ياللى عنى متوهانى
اللــى يشـــــــــــرب نبع نيلك راح يعــود للنبع تانى
شـــــوفى عاد وانا حتة منك جوه منى تلاقى خيرك
مهما طفت وشفت غيرك برضوا عارف فين مكانى

****

بعترينـــى ولملمينـــى وارسمينى فوق حيطانك
حلم نيلى لون عيونك حلم اخضر لون غيطانـك
اصلى لما عشقت حسنك قلبى دوّب نفسه فيكـى
ياللى شغلانى بعينيكى قلبى طول اللعمر صانك

****

فـ المعابد يا حبيبتى ع الحيطان حفروا جــــدودى
الحضارة والأصالة والصمود اللى فـ وجــــــودى
وانا لولا يا عمرى عارف مين الهى اللى خالقنى
كنت للأهرام اسبّح ولترابك كان ســــــــــجودى

بهاء توفيق
منفلوط /2000

الأربعاء، 19 مارس 2008

الجنازة

الجنازة

الليل شبح...!!

منقوش على كل الوشوش

الخوف بيتحدى الجيوش

فمتتعبوش...

وتحاولوا تعديل المسار

لا .. انتصار

للى ارتضى يوم الخضوع

للى ارتضى يوم المهانة ولستكانة والخنوع

للى ارتضى انه يموت

دافن حركته وكلمته جوا السكوت

تحت البيوت الميته

كل المواسم شكلها اصبح شتا

طالعه الجنازة بس ليه مش ملفته

يا ايها الميت هناك ...

يا ايها الميت هنا ...

لو كان كلامى هيجرحك

اسف انا

الحق لجل ما ينتصر محتاج لميت مليون سنه

فبلاش تموت

يا تموت مفجر الف دانه فـ سكتك

يا بلاش تموت

يا تموت تصحى الميتين من صرختك

يا بلاش تموت

يا تموت محرر غنوتك مع ضحكتك

يا بلاش تموت

يا ايها الميت هناك

واقف بترمى ليه حجر

وبترمى ليه روحك هدر

فاكر حجارتك يوم هتصنع معجزة

فاكر اذا ....

شفنا الكفن راح ننتفض

حتى الدموع جوا العيون متتعززة

يا ايها الميت هناك

كل الخلايا فـ جتتى متنرفزة

صورتك بدمك فى عقول كل البشر متبروزة

فـ لمين بتعلن لنتفاضة ولحتجاج

كل العيون ملت خلاص من رؤيتك

كل الودان تعبت خلاص من صرختك

كل القلوب مفهاش مكان

تحزن تحن لمحنتك

فلمين بتعلن لنتفاضة ولحتجاج

يا ايها الميت هناك

يا تموت شهيد....

ويموت قصادك الف قرد من القرود الاغبيا

يا بلاش تموت

محناش ف عهد المعجزات والانبيا

علشان حجر يصنع لوحده الانتصار

عمر الشهادة والبطولة فى يوم ما كانوا انتحار

عمر النهار.... ما هييجى صدفة لارضنا

يا ايها الميت هناك

لو كان كلامى جرحك

اسف انا.... اسف انا ....اسف انا

بهاء توفيق

منفلوط

14-3-2001

فانتازيا

فانتــــــــازيا

مزج اول :

النص واقف فـ الشمال ...

العرض شغال فـ اليمين

اتخانق النقاد سوى ...

اتخانق المتفرجين

تقسيمة تشبه قتل سيدنا الحسين

تغريبة من عهد الهلالى

ف الف ليلة والف بحر والف كلمة والف حرف مفردين

مع الف فكرة بتتخنق جوا الصدور

كان السيناريو والحوار وجميع شخوص العرض .....

واقفين ف الطابور

الارض بتفرق سكك

الشمس بور

العتمة ما بتفرقش ابداً برة او جوا القبور

فاستسلمى يا نفس ليا وابدائى حالة كمون

جسدى المهيأ للسكن اصبح مهيأ للسكون

طعم الجنون لساه يا موت متملكك

اطلق بخور عريك على كل الملا من غير خشا

كمل طقوس الانتشا واشربنى كاس

لملم حدودى كلها من راسى ولحد المداس

اصلبنى بين المستحيل والممكنه

علقنى بين اللا مكان والامكنه

لسه الدروب السد مستنيه نور

***

مزج أخر :

اغزلنى معزوفة بكا للصيادين

الحزن دمى وغنوتى ....

الحزن وقت الكفر دين

البحر دوره ماهوش محدد ع الورق ....

من حقه انه ينسحب لو حس ان الدور مهين

للبحر شخصية نبى ....

وبلدنا بكر عروسة بنحنيها ليه

فيمد يلمس جسمها كله بعينيه

البحر مدد جسمه يحضن شطها ويحل ضفايرها بأيديه

حاول يفك طلاسم المجهول هوى

ما ضل صاحبكم وما - ابدا -غوى

لكن دوره بينتهى قبل الولوج

فيشد نفسه وينسحب ..!!

مشهد خرافى بتصنعه حالة غضب

وانا كنت فاكر انه حافظ دوره صم

الكادر اصفى من الفضى

لكنه كان مصبوغ بدم ..!!!

****

مزج ثالث :

تعبت شواشى النخل من برد الشتا

فاتقرفصت جنب الكانون ...

تتلقى من صهده الدفا

كان الكانون طيب قوى

خاف ع الشواشى لتنحرق

اختار تعيش....

واختار لنفسه الموت

........... طفى !!!

****

قطع مفاجئ :

للعلم بس ...

الشمس لونها رمادى مش بمبى

قلقانه تظهر تختفى جنبى

***

مزج اخير :

الحلم تكعيبة عنب على كل دار

الحلم اقوى من الدفا /البرد/الليل /النهار

الحلم شباك للسما

مرجيحة بتطوحنا فوق

من خاف من الحلم اتحرم

تلاقيه يفوق

الشمس دورها يبتدى ....

فترش حبة ضى على وش القمر يتهد

سلم خشب .... على سطح بيتنا .... فـ حارة سد

بهاء توفيق

منفلوط

2001