يا دنيا دورى ... بهاء توفيق

حنين _________ بهاء توفيق

لما العواطف ترتعش  ….
تنزف مطرها فـ دمنا
ييجى الحنين ويشدنا من نفسنا  ….
فنخاف علينا من الغرق
الصمت اقوى من الكلام …. فيلفنا
نسكت فيبلعنا القلق
صوت المطر بيفكر القلب بعرق
نعرق فنعطش نستحى نطلب رجوع
 فنبل ريق الفكر بشوية دموع
يلفحنا برد السكة نبدأ نرتجف
ونحس جوع الجتة لشوية دفا
نبعت لشمس الذاكرة …. فتصدنا
 وتردنا من غير دفا
 باين عليها الشمس مش بتحبنا …!!
امال غناوى الضى بتسافر لفين ….؟؟
 وبترتمى على صدر مين  …؟؟
 واحنا اللى اللى كنا من عيون الشمس دايما نحترس
……………….
………………
لحظة حداد على قبر فارس مات على ضهر الفرس
………………
………………
الارض فرض فـ سعيها
واحنا اتخنقنا من الشلل ومن الخرس …
 ومن الاوامر......

  والنواهى ….

 والطوارئ …

والحرس
فندور نلملم حلمنا مع صبرنا ونلضمة سبحة خرز
ونقوم فنطلق من بخور الحب بستان الطيابة
نبدر بذور الابتسام
تطرح سنابل ضحك اصفى من سمانا ف شهر بابه
يااااااااااااه …. انا نفسى مفتوحة النهارده للكتابة
انا نفسى اخلص من همومى وشكوتى
 وابدأ هديلى مع الحمام مغرم صبابة
           من فضلكم…..
انا خدت من نفسى النهاردة اجازة

فبلاش تتعبونى
وتكلمونى عن اللى كان
وترجعونى لازمتى زلزلتى ولغربتى
ولكل اوجاع الزمان          

ولكل انات الغلابة
دانا نفسى مفتوحة النهارة للكتابة
انا نفسى مفتوحة النهاردة للكتابة

خدنى فـ باطك ....!! _________ بهاء توفيق

مسكون بالهم ليلاتي أبات سهران للصبح

خسران طول عمرى ماشفتش ربح

مسجون بالقهر وسجانى ..

لا رمانى اعدّد على حالى ...

ولا بطل نبح

مع انى لا كنت فـ يوم فايع

ولا نفسى اتعالت على نفسى ....

واحتاجت كبح

خياراتى المحدودة اتحسمت

أنا والأحزان فوله اتقسمت

ولا عمر البسمة اللى اترسمت..

على وشى زمان كانت بصحيح

وانا طول اليوم القى التجريح

ازاى بالليل انا ممكن انام

ملعون القلب اللى اتحشرت ...

جواه اوهام ....قام صدقها

حدش طول عمره قدر يمشى

جنب الاحلام ...

او يسبقها

مخنوق الدمع المتْكوّم فى مجارى العين

قام شققها

انا فوقت زمان على صوت فكرة

حست بالموت متدبقها

معرفتش ارد

مين ياخد راسى فى اى مكان ويدقدقها ..

ومكانى يصد

انا نفسى اخلعنى من نفسى ...

واخلص وافض

دانا فين ما أكون او فين ما أروح..

الهم ياخدنى يسلسلنى ...

ويشيل ويحط

الموت اهون من عجز الروح

لو كان مسموح...

انا كنت بروحى فـى قلبه انط

الموت بيعز على الطالب...

لما الايام تمشى على الشوك ...

والعمر يمط

ارحمنى يا موت...

خدنى فـ باطك

وابدأ بالدبح

مليت طول عمرى اكون سهران

مستنى الصبح

ارحمنى يا موت  ...

خدنى فـ باطك

وابدأ بالدبح .

قصاقيص .... 5

قصاقيص ..... 4

مقطع من قصيدة .. هذا ما كان ولا اكثر .... بهاء توفيق

قصاقيص ..... 3

دينا ... بهاء توفيق

قصاقيص ...2

قصاقيص ..1

••• هياها نفس المِحن ••• بهاء توفيق

‏

وبأمر مين تبقى الايدين ورا ضهرنا متشبكة ..؟؟
وبأمر مين نضحك زعل والضحكة يغلبها البكا ..؟؟
أمرك عجيب يا موريانى الفرحة فيلم ...

ومعيشانى الحق حلم ...
ومطفشانى من سنين ظلمك لظلم ...
ومفهمانى عشان أعيش لازم أطاطى 
عايزانى وقت الذل أخرس أو أخاف وأجر واطى 
عايزانى كيف وانا بتسحل اخدك فى باطى ؟؟؟

لسه الديدان سارحين على بدنك بيبنوا ألف عش
لسه الطريق مفروشة غش ف غش
لسه عيالك ع القهاوى وع الرصيف بتنش
وكلاب كلابك لبسوا نفس الوش
من كام سنة سيبانى أشكى بلوتى
طب كام سنة هفضل أدش ؟؟؟
ملعون ابوكى يا كارهة للتغيير 
يا بير بيسقى الغير ...
وانا بس ليه ماشاربش
عطشان بطول عمرى .... وانتى مبتحسيش 
ركنانى ع الهامش أهش وانش
يا محرمانى أعيش ...
ومحرمانى أموت ...
عايزانى بين البينين أفضل كده ...!! 
طب اعمل ايه ما قادرش 
جسدى النحيل من طعنتك بيكش 
يا معلمانى الشحاتة فوق رصيف القهر
عايزانى ليه مفضوح ...
أمشى ف طريق العهر
حتى الغسيل الوسخ .. نشراه ف عز الضهر
شمتوا كلاب السكك واستهزءوا بيا 
سلبونى سيف عزتى .... واستفردوا بالمهر

خايف من اللى جاى ... نبت الشقا طارح 
العتمة ع الأبواب ... سحبانا لـ امبارح
الدم تمنه دم ... مش تمنه نتسامح 
جامح يا خيل الجشع .. يا ابو زفة ظباطى
يا دولة المهيصة والضحك ع الفاضى
يا دولة المريسة بين عسكرى وقاضى 
يا دولة المتعسة لمعارضة كدابة 
واخوان ديابة بتنهش فيا وتراضى 

وكأنى مش موجود بيقسموا التركة 
وقالولى لو زعلان اشرب من البركة
حطينا ايدنا خلاص ع العزبة والشركة 
وانت مالكش مكان ...
هياها نفس السِّحن والخامة والماركة 
هياها نفس المِحن فوق القلوب باركة 
دخلوا الفراودة السجون .. لعبوا اللى ع الدكة 
مكفاهمش اللى ضاع بيبصوا للفكة

بهاء توفيق 
19/10/2012

هنا ...مالطة___ بهاء توفيق

لا ليك أول ولا أخر

يا ليل ساخر

بتضحك حتى على روحك ..وع النايمين

وع الواقفين محلك سر

وع الماشيين بخلفا دور

حقيقة بتتعجن بالمر

ناكلها سنين وسنين

سينين يوسف يا 7 عجاف

سينين هذا الزمان 30 جفاف × جفاف

ومش عارف سكت ازاى ....

بقيت خواف ؟

واخاف ازاى من الدولة؟

وكان اولى ..اصلى الصبح قبل الشمس

واعيش الامس

ويوصل صوتى كل الناس ...

وميكونش الكلام بالهمس

وميكونش الكلام مكتوم

وليه ع الصبح اتشنكل فى تل هموم

طابور العيش ..وزحمة سير

وحرامية فـ مكاتبهم ..ومش نازلين على المواسير

وقلة خير فى قلب الناس

وموت لضمير

وبركة صرف ع الابواب

ووعد بشقة ووظيفة ..ولقمة شريفة للمحتاج

ووالله العظيم كداب

و....طن شباب بيتعلم لكن جاهل

وعدل بيسرى ع الغلبان

وع الباشا بيتساهل

وليه ساهل يا موت الناس

بعبارة /بقطر/بنار/بإستهتار/بزنزانة

وليه كرامتنا متهانة فى كل مكان ؟

ولا سائل ولا مسئول

وكام دلدول فى مجلس وهمى بيهاتو

ولو قولنا فى يوم هاتو ...

بناخد بس بالمراكيب

واخر الليل بنتشاكل على الانابيب

ونطفح ميتك يا نيل ...عكار × عكار

يا سلايتين وكام مسمار فى عرض الزور

وباين يا تاريخ مكتوب ...ونصك زور

سواقى الدهر عطلانة ...ومش بتدور

ومش بتلف

يا خلق العقل شت وتاه ...

خلاص هيخف

ولا قادرين فى وش الريح نقف ونتف

ولا عن بعض نتحامى

يا لوامة يا نفس خلاص ..

كفاية سنين بنتعامى

كفاية سنين بنسكت غيظ

ونسقط جوه دوامة

تدور بالعكس بلكاعة

يا كتر الناس ..يا شماعة

منين هيجيبو ليكم قوت

مدام عايشين عليك عالة

يا عم اخلص وخلصنا ...وخصخصنا

وبيعنا ولو ب 100سحتوت

نسيت ازاى يا قطر الموت

متزعق تووووووت وريحنا

وسيبنا نموت على الطاعة

مع الباعة وفى الاكشاك ..

فى مكرفونات/ف سماعة

فى بر/فى بحر /ف إذاعة

بيان اتصاغ فى كام ساعة :

- هنا مالطة

وأذن زى ما تأذن ....

شريعتنا شريعة الغاب

وحكم الخلق بالبلطة ..

ومفيش غلطة

لأن احنا بشر اوفر

نزيد عنكم بكام شرطة

وحقق لو هنسمحلك ...

تسمعنا سلام التت ...

وتترقص وتتمحك كأنك بت

ساعتها بجد هارتحلك ..

وتبقى الفت ...

تبقى الألفى ع الباقيين

8 عشرات من الملايين

بدون معنى ... بدون لزمه

تعارضنى ....

بدون انذار ...

هحطك نعل للجزمة

هنا مالطة ...

بلد هادية ..

بلد رايقة ...

مفيش زحمة ...

مفيش دوشة..

مفيش ازمة .

                                                        اول يناير 2010