••• هياها نفس المِحن ••• بهاء توفيق

‏

وبأمر مين تبقى الايدين ورا ضهرنا متشبكة ..؟؟
وبأمر مين نضحك زعل والضحكة يغلبها البكا ..؟؟
أمرك عجيب يا موريانى الفرحة فيلم ...

ومعيشانى الحق حلم ...
ومطفشانى من سنين ظلمك لظلم ...
ومفهمانى عشان أعيش لازم أطاطى 
عايزانى وقت الذل أخرس أو أخاف وأجر واطى 
عايزانى كيف وانا بتسحل اخدك فى باطى ؟؟؟

لسه الديدان سارحين على بدنك بيبنوا ألف عش
لسه الطريق مفروشة غش ف غش
لسه عيالك ع القهاوى وع الرصيف بتنش
وكلاب كلابك لبسوا نفس الوش
من كام سنة سيبانى أشكى بلوتى
طب كام سنة هفضل أدش ؟؟؟
ملعون ابوكى يا كارهة للتغيير 
يا بير بيسقى الغير ...
وانا بس ليه ماشاربش
عطشان بطول عمرى .... وانتى مبتحسيش 
ركنانى ع الهامش أهش وانش
يا محرمانى أعيش ...
ومحرمانى أموت ...
عايزانى بين البينين أفضل كده ...!! 
طب اعمل ايه ما قادرش 
جسدى النحيل من طعنتك بيكش 
يا معلمانى الشحاتة فوق رصيف القهر
عايزانى ليه مفضوح ...
أمشى ف طريق العهر
حتى الغسيل الوسخ .. نشراه ف عز الضهر
شمتوا كلاب السكك واستهزءوا بيا 
سلبونى سيف عزتى .... واستفردوا بالمهر

خايف من اللى جاى ... نبت الشقا طارح 
العتمة ع الأبواب ... سحبانا لـ امبارح
الدم تمنه دم ... مش تمنه نتسامح 
جامح يا خيل الجشع .. يا ابو زفة ظباطى
يا دولة المهيصة والضحك ع الفاضى
يا دولة المريسة بين عسكرى وقاضى 
يا دولة المتعسة لمعارضة كدابة 
واخوان ديابة بتنهش فيا وتراضى 

وكأنى مش موجود بيقسموا التركة 
وقالولى لو زعلان اشرب من البركة
حطينا ايدنا خلاص ع العزبة والشركة 
وانت مالكش مكان ...
هياها نفس السِّحن والخامة والماركة 
هياها نفس المِحن فوق القلوب باركة 
دخلوا الفراودة السجون .. لعبوا اللى ع الدكة 
مكفاهمش اللى ضاع بيبصوا للفكة

بهاء توفيق 
19/10/2012